Sejarah desa keliki

BABAD LAN WASTA DESA ADAT KELIKI

Om swastyastu

            Pengacep  manah titiang mantuka ring Idha Shang Hyang Widhi Wasa maka miwah ring Bhatara Bhatari Samodaya , dumadak idha asung kertha wara nugraha , mawastu prasida  antuk tityang nyaritayang indik kawit desa adat KELIKI .

            Indik kawentenan desa adat KELIKI sekadi mangkin prasida pacang katur sangkaning wenten bawos para panglingsir ring desa adat keliki , miwah panuntun sakeng lontar Bali Tatwa lan Prasasti sane siosan.

            Carita puniki kakawit pecak sane riin sangkaning pamargan Idha RSI MARKANDEYA  , idha tedun saking payogan idha sane magenah ring pura payogan agung ngelanturang  pemargan ring gunung lembah nuju ring utara ring pelantaraning margi idha napak ring genah tanah nia ceking,   pemargan Rsi Markandeya raris napak rig genah sane pekantenia bet pisan antuk tetaneman sane asoroh . sane marupa Jarak  Bang, ring genah punika raris idha masandekan tur mapikayun indik wastan jagate sane bet olih punyan jarak sane alit  alit, raris genah utawi jagate punika  kawastanin ‘’KELIKI’’  dwaning genahe sane bet irika makweh wenten punyan jarak bang, sane taler maartos ring   basa Jawine Keliki, dados nia jarak pateh ring Keliki. Mangkin kabaos  “Desa Adat Keliki”  .

            Ring  penguluning jagat  keliki   ida mangkin manggihin teja utawi sinar , risampun katatasin mina kadi punika wantah metu saking batune, kasuen suen batune  punika kalinggihan ring panguluning jagat keliki, sane kabaos mangkin mapesengan sugra  pakulun  Ratu LINGSIR TEDUNG NGINYAH , utawi  Idha bhatara  Ratu Lingsir,  pinak pangemban  jagat keliki puniki.

            Rikanjekan  selanturnyane jagat keliki sane mawiwit sakeng wastan punyan jarak bang , kabaos olih wawidangan  jagat mengwi  pinaka panyade pemucuk jagat  mengwi sane kabaos raja mangwi ring desa keliki wantah sinalih tungggil manggalaning warga pasek gelgel pinaka mannggalaning desa keliki sane ngemargiang sekancan titah sakeng raja mangwi

            Kawentenang Desa  keliki  duke nguni Wantah marupa tanah sane jimbar turin becik kaangge matetandurin .  dwaning asapunika , warga pasek gelgel mapinunas ring Raja Mangwi mangdane Ida sweca ngawantu ngaryaning Empelan ring punika raris kalugrayang , raris kakaryaning empelan sane magenah ring wahyobyaning desa .  Raja Mangwi  ngutus panjak ida mangda nyarengin makarya ngaryaning empelan punika, mungguin panjak sane kautus  makeweh pisan, dwaning kadi punika kabawosang “  PANJAK TELUNG BLULANG BEDAH” panjak panjak sane kautus punika makasami makta babekelan sane marupa KATIPAT . tios ring punika Raja Mangwi taler mapaica KAMBING Lanang Wadon mangda kapliara ring wewidangan empelan sane kagarapin.

            Riantukan sami pisan para panjake makarya ring empelan  punika kasuwen-suwen  akweh pisan wenten kulit-kulit katipat sane malakar   antuk busung, sapunika taler bacin kambing sane kapliara naler makweh , dadosnyane kulit katipat lan bacin  kambing punika olih para panjake sane makarya kaangge anggu ring empelan punika , dwaning kadi punika risampun empelan puput , raris kawastanin       “Empelan Tain Kambing” mungguin sane ngangge toyan empelan punika pinaka toyan  sawah kawastanin “  Subak Tain Kambing”   , malarapan kadi punika rawuh maangkin para panjake ring desa Keliki ten purun ngadol  Tipat sane mawit sakeng busung.

            Kasuen-suen malarapan antuk empelan inucap desa keliki nyayan becikan , ngantos kapireng olih sang maraga  pamucuk jagat gianyar sane kasinanggehang Raja Gianyar sane mapuspata I Dewa Manggis Kuning , I Dewa Manggis kuning mapikayun mangda prasida jagat keliki kawawa olih  wawidangan jagat gianyar , raris ida nitah I dewa Gede Rai Aji sane sampun prasida ngwawa jagat selat Beng Gianyar, mangda ngebug Jagat Keliki Tur Karanjingan ring wewidangan jagat gianyar.

            Warsa 1768  masehi , I Dewa Gde Rai Aji saha kairing olih petang dasa diri Bala Wadwa Lunga magegebug ring desa keliki.

Pelantaraning margi bala wadwane jenek abosbos ring genahe sane mawasta jagat gunung kila , sane magenah ring purwaning jagat keliki,  pinaka genah ngila kanentenan jagat keliki sergep saha pinunas mantuka ida bhatara sane malingga irika , mangdane labda karya napi sane kaulati. ring genahe punika  raris I  Dewa Gde Rai Aji kapica sabda mangda ngangge obor pinaka sarana magegebug ring Desa Keliki obor Punika kaiket Masambung-sambung mawastu madue kalih tanggu , tanggu kaping siki sane wenten ring pura gunung kila kagambel olih I dewa gde rai aji mungguin tanggu sane malih siki ngantos ring banjar kelabang moding kagambel olih sinalih tunggil pengiring ida, obor punika kaayun-ayunan mawastu dahating rame pakantenan bala wadwane ring genah ngalaksanayang gagebugan ring rahina wengi punika , turmaning bala wadwa punika polih wantuan ring para panjake ring waawidangan jagat tegallalang pinaka marengin masuryak murub.  Ngantenang kagaduhang sane madurgama kadi punika panjak ring desa Keliki kaliwat jejeh , tur para nayaka praja pinaka rencang raja mangwi mangungsi nyelametang angga dwaning kadi  punika I Dewa Gde Rai Aji prasida ngranjing ring desa pajarakan saha nenten wenten biuta lan bhaya , munguing para warga pasek gelgel tan nyarengin magingsir kamawon ngaturang raga ring Idewa Gde Rai Aji ring genahe sane mawasta padukuhan  ( mangkin ring purwaning pura masceti ) saha masatya nenten  pacang purun ring ida ngalantur ring sahanan warih idane , saking genahe   inucap desa  keliki kawawa olih wawidangan  jagat Gianyar .

            Manutin ring dinas , Desa Keliki nranjing ring wawidangan  desa Keliki , kecamatan tegallalang kabupaten Gianyar provinsi Bali,  panegara  Indonesia ,.

            Ainggih asapunika antuk nyaritayang kawit Desa Adat Keliki puniki , tuna luwih antuk nguningayang , tur tan nganutin ring tata titining basa wantah geng rena pengampura  sane tunas tityang, dwaning  nenten ngawinang duleg kantun sang ledang ngwacen ,pamuput atur eling tityang ‘’ tan ana wong swasta nulus “    Om Santhi Santhi Santhi Om.

                        Nganinin  indik parahyangan ring Desa Adat Keliki  :

1.      PURA PUSEH                                       : saniscara kliwon wuku kuningan.

2.      PURA DESA                                          : Purnamaning kalima

3.      PURA DALEM                                      : Anggara kliwon wuku medangsia

4.      Pura Duur Gunung                              : purnamaning kadasa

5.      Pura mutering pejarakan                   : purnamaning kadasa

6.      Pura panca panawa                            : redite umanis wuku kelawu

7.      Pura duur bingin                                 : wraspati umanis wuku dungulan

8.      Pura mrajapati                                    : anggara kliwon wuku medangsia

9.      Pura melanting                                   : buda wage wuku kelawu

10.  Pura Dalem Sakenan                          : Buda Umanis Wuku Dukut

11.  Pura Gunung Kawi utawi masceti       : purnamaning kapat

Sumber : buku eka ilikita